الأربعاء، يوليو 11، 2007

مفيش بحر علشان الريس...واللي مش عاجبه قدامه


تبدأ الحكاية

اني روحت يومين اسكندرية بدعوة كريمة من واحد قريبنا ليا ولاختي لقضاء يومين معهم وكانو يومين تمام ساتحدث عنهم في وقت لاحق

لكن الان احكيلكم اللي حصل
صحيينا في يوم من اليومين دول وقلنا نبص على الشط وايه اخباره وبنبص من البلكونة
نلاقي الكورنيش اتحول للون الاسود المعهود اللي عارفينه في الجامعة كويس
قلت يا فتاح يا عليم يارزاق يا كريم هو في ايه؟؟
بنسال ونطقس عرفنا ان ريسنا اللي مهنينا وباسطنا جاي يفتتح مشروع سان ستيفانو
والحاجة الجميلة في الموضوع ان الريس رايح سان ستيفانو من على طريق الكورنيش
يعني الامن قافل الكورنيش خالص محدش رايح ولا حد جاي
يعني مش كفاية القاهرة واللي بيحصل فيها بسبب المواكب العظيمة ومع ما يرافقها من جلبة امنية على اعلى مستوى
لا ....بيصدرو الامر لعروس البحر المتوسط يعني مش هيسيبو الناس في حالهم مش هيسبوهم في حالهم
وطبعا محدش يعرف يروح الشط ولا حد يقدر يرجع منه وبرده بسبب مرور الريس
واللي عايز يسافر او اللي وراه مصلحة او اللي عنده حد تعب فجاة يخبط راسه في اجدعها حيطة
.....قصدي ...عنده البحر
واليوم ده بحمد ربنا اني مش كانت رايح البحر كنا رايحيين المكتبة والقلعة وقلنا بلاها بحر النهاردة
بس الناس دي ذنبها ايه؟؟؟؟
وافتكرت ساعتها سيدنا عمر
اه افتكرت سيدنا عمرلما جاله احد جنود الروم فسال عليه فقالوله المستظل تحت الشجرة هناك

"فجاءه قائلا "حكمت فعدلت فامنت فنمت يا عمر


وافتكرت كلمة مشهورة "هشتكنا وبشتكنا يا ريس ده انتا ريس والنعمة ....ايييييييييييييييييييييييييييييييه

المهم اسيبكم مع صور خدتها عن الحدث الكبير

وكان في المفروض فيديو للموكب وهو معدي بس مش شغال على الجهاز لما اعرف اشغله هنزله ان شاء الله

ده الشارع اللي كنا فيه وانتو طبعا شايفين العربيات عاملة فيه ازاي





ودي والناس بتحاول مع الامن علشان يعديهم




وهنا لما اشتد الزحام

وهنا لما الناس يئست وراجعة لبيوتها

هناك 9 تعليقات:

طلة قمر يقول...

المشهد ده بنشوفه كتير في بلدنا مش في اسكندريه بس المشكله لمايكون الواحد مش مستعد لحاجه زي دي يعني عامل لنفسه خطه ليومين هايقضيهم بعيد عن المشاكل والزحام واخبار الدنيا ويلاقي الحاجات دي بتلاحقه بردو مهما راح ويفضل ذهنه مشغول وميقدرش يستمتع بحاجه بس متهيالي ان انت استمتعت بردو على الرغم من ده كله ولا افكرك بالصخرتين هههههههههههههه

بس ماشاء الله جميل الموضوع والصور كمان رائعه

ربنا يوفقك

خطــاب يقول...

عادى

انت فى مصر

بن توفيق يقول...

المشهد ده اتعمل معايا ومع اهلى السنة اللى فاتت فى الاسكندرية
ومنعنا من النزول من البيت لغاية ما الريس عدى


على رايك يا خطاب .. انت فى مصر

بحب الحرية يقول...

آآآآآآه..فرعون وجنوده !!

حسبي الله ونعم الوكيل ..

وكل مصيف وإنتم طيبين :)

وائل_صح ولا غلط_ يقول...

يا سيدي

ده الموقف ده بيحصل يوميا في شوارع القاهره المحروسه

واللي بيعدي بقي مش الريس لا ده ممكن يكون واحد انت اصلا ماتعرفوش ولا سمعت عنه قبل كده

فعلا لما تشوف المناظر دي يبقي انت اكيد في مصر

غير معرف يقول...

انت شكلك هاتروح في داهية بتصور موكب الريس وبعدين الريس يعمل اللي هو عايزه انت عايز تساوي اي مواطن بالريس ولا ايه انت عايزه يشوف امثالك عشان يتنكد ولا ايه ده بابا حسني وانت عارف بر الوالدين واجب وادي البلد كلها بتبر اهيه0
عمك عز

Bent Elqran يقول...

عادى جدااااا

مش غريبه خالص

cleopatra يقول...

لنا الله .. علي فكرة مفيش بلد متقدمة فيها خااااالص الكلام ده .. رئيس .. رئيس وزراء .. ملك حتي .. بيعدي عادي في الشارع زيو زي باقي البني ادمين

ياللا الحمد لله

سمسم يقول...

معلش هي البلد كده.. ثم إن مقارنتك حسني بعمر.. مش موضوعية فأين التراب من السحاب.. إيش جاب لجاب